شفتو الغياب و ما يدير

السلام و عليكم و رحمة الله و بركاته و الصلاة و السلام على اشرف المرسلين و خاتم النبيئين محمد عليه الصلاة و السلام

اليوم كنت نتسنى الدكتور فالعيادة ديالو و سمعت حوار
داز

بين 2 ديال التلميذات واحدة تغيبت عن الدراسة .

و الإدارة طَلبات منها تجيب ولي الأمر ديالها ، صديقتها

قالت ليها : سيري طلبي شي امرأة فالزنقة و زاوgي

فيها تمشي معاك .. أنا مانعرف واش فضولية ..

أو كنطبق من رأى منكم منكرا....... - تدخلت و شرحت

ليهم أنها خصها تكون صريحة مع والديها و تشرح ليهم

المشكل و ما تطبقش النصيحة ديال الصديقة ..

و كعادتي في كل مَجمَع حْكيت ليهم على واحد القصة

وقعات لتلميذ شحال هادي و حكاها لبنا وأنا مانسيتهاش

و هوما ضحكو وقلت مع نفسي علاش ما نحكيها لأحبابي

في المنتدى - و راني ماكنزيدش فيخرات كنحكي داكشي

اللي وقع بصدق و أمانة **

هاد الولد كان قبيح بزاف و دايما كيتأخرعن الدخول لليسي

في الوقت ديالو واحد النهارحبسوه في الإدارة قال لو

الحارس والله و ماجا ولي الأمر ديالك إيلادخلتيها ...

مسكين ما عرف ما يدير و ماقدرش يجيب ماماه حيث أولا

خدامة عند الناس و ماعندوش باباه يعني يتيم ، بقى يفكر

و جاتو فكرة جهنمية ، مشى حدى الموقف ديال لعيالات

اللي يقلبو على خدمة .. و اختار واحدة فيها المواصفات

المناسبة ديال ماماه و اشرح ليها المشكلة اللي عندو وقال

ليها :أنت مثْلي الدور ديال ماما حيث هي مريضة و أنا يتيم

و ما بغيتش نضيع لقرايا ديالي .ولكن المرأة طماعة قالت

ليه نمشي مْعَاك بشَرْط تْدَوّر معايا ، اتفق معاها يعطيها

.. 10dh ماقبلاتش وبقاو شَدْ مَنْ هنا و ارْخَف من هنا

حتى اتافقو على 20dh و مانساش يحَفّظها اسم ماماه و

المرحوم باباه و أسماء الإخوة ديالو و العنوان و طلب منها

تْخاصَمْ عليه قٌدّامهم باش يثيقو و تحلَف عليه حتى تْقَتْلُو

بالعصى ملّي يرجعو للدار..وصلوا حدا باب الليسي و هي

توقف و قالت ليه واله ما نتحَرّك من هنايا حتى تسَبّق

ليا 20dh دابا أنا ماعنديش فيك الثقة ...

دخلوا بجوج الإدارة استقبلهم الحارس العام و صاحبنا قَْدّم

المرأة على أنها ماماه ، إيواأنتوما عارفين الحراس
العامون و monoteurs آش كيديرو كايقولو للوالدين اللي

درتيه أنت و يْلَصْقُو فيك اللي داروه المشاغبين الآخرين .

قال ليها الحارس العام : ولدك ما مربيش و مامأدّبش و

ماكايقراش مزيان وكسول وشحال من مرة حَصّلْناه يكمي

في المراحيض و كَيْبَسّلْ على لَبنات ، أحنا بْقَى فينا حيث

يتيم وإيلاما دْخَلْشْ سوق راسو غادي نطردوه.

لَمْرَا مسكينة انْدَمْجَاتْ مع الدور و ناضَت شنقات عْليه و

عطاتو بْطرْشة و عاوداتو بْواحدة أخرى .......الولد اصبر

و خَنْزر فيها باش تَحْبَس شوية ولكن مع من !!!!!!!

هههه هي صافي بدات شانقة عليه و كَتغَوّت : ياك الحمار

كنخدم فالديور باش أنت تقرا و أنت كتكمي و تْبَسّل على

لبنات و ماكتقراش باغي تفقصني تّبْعْني لبّاكْ .

مابقاش قدها التصرفيق مشات للقميش و العَضّان وهو

صْبَرْ حتى عيى و هو يبدا يتضارب معاها ويَدْفَعْ فيها ،

الحارس العام تيفك فيهم و كيقول ليه : ناري على مسخوط

الوالدين كيضرب مّو ، حشومة عليك .. الإدارة تْجَمْعُو

عليهم كيفكو فيهم - ردْي ليا فلوسي 20dh ديالي و مَلّي

صَرفَقْها عادْ فاقت من الgلبة و لقاتو مسكين وجهو احمر

بالطرش و القميش و هو شانق عليها و كلشي كيغوت ناري

مسخوط الوالدين كيضرب مّو و اصحابو الّلي عارفين

القصة مَيْتين عليه بالضحك ...

مالقى حتى حَلْ إلا يعاود للإدارة الحقيقة و لمرا تْسَلْات

منهم و هربت و خونا مسكين مشات ليه 20dh و كلا

طرحة ديال لعصى عنداكم تديرو بحالو كونو عاقلين
ههههههههههههههههههههههههههههههههههههههه